साखरेने चार्ज होणार मोबाईल

आत्तापर्यंत तुम्ही झाडाच्या पानाने, सायकलशी जोडून किंवा चालता चालता मोबाईलची बॅटरी चार्ज करता येऊ शकते, याबद्दल वाचलं असेल. परंतु जर तुमच्या शरीरातील साखरेच्या (शुगरच्या) मदतीने तुम्हाला आपला स्मार्टफोन चार्ज करता येईल असे सांगितले तर तुमचा त्यावर विश्वास बसणार नाही. मात्र लवकरच अशाप्रकारची बायो-बॅटरी सर्वसामांन्यासाठी उपलब्ध होणार आहे.

व्हर्जिनिया टेक नावाने प्रसिद्ध असणाऱ्या व्हर्जिनिया पॉलिटेक्निक अॅण्ड स्टेट युनिव्हर्सिटीमधील संशोधकांनी या अनोख्या बायो-बॅटरीचे डिझाइन तयार केले आहे. ही बॅटरी कमी वजनाची असून अधिक कार्यक्षम आहे. अनेक इलेक्ट्रॉनिक उपकरणांमध्ये वापरण्यात येणाऱ्या लिथियम आयन बॅटरीपेक्षा या बायो-बॅटरीची क्षमता जास्त आहे.

कशी काम करणार ही बॅटरी

या बॅटरीच्या मदतीने शरीरातील साखरेचे (शुगरचे) इलेक्ट्रॉनिक ऊर्जेत रुपांतर करण्यात येईल. आपल्या शरीरात होणार अन्नप्रक्रियेप्रमाणे ही प्रक्रिया होणार आहे. यामध्ये इलेक्ट्रॉन बाहेर काढताना साखरेचे रुपांतर कार्बन डायऑक्साइड आणि पाण्यात होईल. या बॅटरीमध्ये साखरेचे पूर्णपणे ऊर्जेमध्ये रुपांतर होणार आहे. म्हणजेच यामध्ये बॅटरीमध्ये साध्या बॅटरीपेक्षा जास्त क्षमता असणार आहे. 

व्हर्जिनिया टेकमध्ये संशोधन करणाऱ्या झिंगुआंग झू यांनी दिलेल्या माहितीनुसार लिथियम आयन बॅटरीमुळे फोन फक्त दोन दिवस चालू शकतो. मात्र आमच्या संशोधनामुळे भविष्यात साखरेकडे इंधन म्हणून पाहिले जाईल. ही बॅटरी चार्ज न करतान तुमच्या मोबाईलला १० दिवसापर्यंत अखंडपणे उर्जा पुरवू शकते अशी माहिती झू यांनी दिली.