गुगलच्या दोन ओएस का?

सध्या काही कंपन्यांनी अँड्रॉइडवर आधारित लॅपटॉप सादर केले आहेत. काही विशिष्ट सॉफ्टवेअर विंडोजवर इन्स्टॉल केले की अँड्रॉइड अॅप डेस्कटॉपवरही वापरता येतात. असे असताना, गुगलने अॅण्ड्रॉइड आणि क्रोम या दोन वेगवेगळ्या ऑपरेटिंग सिस्टीम्स का निर्माण केल्या, हा प्रश्न गेल्या अनेक वर्षांपासून या क्षेत्रातील मंडळींना सतावतो आहे. या दोन वेगवेगळ्या ऑपरेटिंग सिस्टीम्स तयार करण्याचे कारण दडले आहे ते, गुगलच्या दूरदर्शी धोरणात. 


अॅण्ड्रॉइड सिस्टीम मोबाइलसाठी तर क्रोम कम्प्युटरसाठी उपयुक्त ठरते. एका अर्थी, अॅण्ड्रॉइड हे भूतकाळाशी नाते सांगणारे सॉफ्टवेअर आहे. त्यातील सर्व अॅप्लिकेशन्स डिव्हाइसमध्येच इन्स्टॉल केलेली असतात. क्रोम ऑपरेटिंग सिस्टीम निर्माण करताना भविष्यातील संभाव्य गरजांचा अभ्यास करण्यात आला आहे. यातील सर्व अॅप्लिकेशन्स इंटरनेटमुळे एकमेकांशी जोडलेले असतात. त्यामुळे, डाटा आणि अॅप्लिकेशन्स या दोन्हीबाबतीत गुगलसाठी क्रोम अधिक महत्त्वाचे आहे. 

'आम्ही कम्प्युटरचा प्रसार करण्याच्या प्रयत्नात आहोत. दैनंदिन जीवनात कम्प्युटरवर आधारित सुविधांचा वापर सतत वाढतो आहे. त्याचवेळी या सुविधा वेगवेगळ्या वापरण्यापेक्षा एकत्र वापरता आल्या तर उत्तम, अशी मानसिकता वाढते आहे. या सुविधांचा वापर अधिकाधिक सहज करता यावा, यावर सर्वांचा भर असतो. क्रोम आणि अॅण्ड्रॉइडच्या रूपाने त्यांचा वापर करणाऱ्यांसाठी दोन चांगले प्लॅटफॉर्मस् आले आहेत. मल्टीस्क्रीनच्या युगात क्रोम हे अॅण्ड्रॉइडसाठी वरदानच ठरते. कारण, क्रोम ऑपरेटिंग सिस्टीम वेब तंत्रज्ञानाची प्रणेती आहे. मल्टीस्क्रीन युगात या सर्व स्क्रीनचे काम योग्य सुरू राहावे आणि त्याचा कम्प्युटर ऑपरेट करणाऱ्यांना जास्त उपयोग व्हावा, यासाठी क्रोम कार्यरत असते.